રેખા ગુપ્તા દિલ્હીના ચોથા મહિલા મુખ્યપ્રધાન બન્યા

રેખા ગુપ્તા દિલ્હીના ચોથા મહિલા મુખ્યપ્રધાન બન્યા

Blog Article

આરએસએસ સાથે 32 વર્ષથી જોડાયેલા પ્રથમ વખતના ધારાસભ્ય રેખા ગુપ્તાએ 20 ફેબ્રુઆરીએ દિલ્હીના ચોથા મહિલા મુખ્યપ્રધાન તરીકે શપથ લીધા હતાં. રેખા ગુપ્તા અને તેમના કેબિનેટ પ્રધાનોએ ગુરુવારે રામલીલા મેદાનમાં ખાતે હોદ્દાના શપથ લીધા હતાં તેમના શપથગ્રહણ સમારોહમાં વડાપ્રધાન મોદી, તેમના કેબિનેટ સાથીદારો અને NDA શાસિત રાજ્યોના મુખ્યપ્રધાન સહિત લગભગ 50,000 લોકો હાજરી આપી હતી.

ભાજપ ધારાસભ્ય દળની બેઠકમાં 50 વર્ષીય રેખા ગુપ્તાને દિલ્હી વિધાનસભામાં ગૃહના નેતા તરીકે પસંદ કરાયા હતાં. અરવિંદ કેજરીવાલની પાર્ટી AAPને હરાવી દિલ્હીમાં 26 વર્ષ પછી સત્તામાં આવેલા ભાજપે તમામ અટકળો પર વિરામ મૂકીને એક મહિલાને મુખ્યપ્રધાન બનાવવાનો નિર્ણય કર્યો હતો. સુષ્મા સ્વરાજ, શીલા દીક્ષિત અને આતિશી પછી રેખા ગુપ્તા દિલ્હીના ચોથા મહિલા મુખ્યમંત્રી હશે. હાલમાં ભાજપ શાસિત રાજ્યોમાં તેઓ એકમાત્ર મહિલા મુખ્યમંત્રી છે.

પાંચ ફેબ્રુઆરીએ યોજાયેલી દિલ્હી વિધાનસભાની ચૂંટણીમાં રેખા ગુપ્તાએ શાલીમાર બાગ બેઠક પરથી AAP ઉમેદવાર વંદના કુમારીને 29,000થી વધુ મતોથી હરાવ્યા હતાં. અગાઉની બે ચૂંટણીમાં રેખા ગુપ્તાને વંદના કુમારી સામે હારનો સામનો કરવો પડ્યો હતો.

તાજેતરની વિધાનસભા ચૂંટણીમાં, ભાજપે 70 વિધાનસભા બેઠકોમાંથી 48 બેઠકો જીતી હતી જ્યારે AAPને 22 બેઠકો મળી હતી અને કોંગ્રેસનું ખાતુ પણ ખુલ્યું ન હતું.

RSSથી લઈને મુખ્યપ્રધાન સુધીની સફર

વિદ્યાર્થી રાજકારણ, એબીવીપી અને આરએસએસ સાથે સંકળાયેલા રેખા ગુપ્તાનો જન્મ 19 જુલાઈ 1974માં હરિયાણાના જીંદ જિલ્લાના નંદગઢ ગામમાં થયો હતો. રેખા ગુપ્તાની રાજકીય સફર 1992માં અખિલ ભારતીય વિદ્યાર્થી પરિષદ (ABVP) દ્વારા દિલ્હી યુનિવર્સિટીની દૌલતરામ કોલેજમાં શરૂ થઈ હતી. 1996-97માં તેઓ દિલ્હી યુનિવર્સિટી સ્ટુડન્ટ્સ યુનિયન (DUSU)ના પ્રમુખ બન્યા હતા અને વિદ્યાર્થીઓના હિતોને લગતા મુદ્દાઓને અસરકારક રીતે ઉઠાવ્યા હતાં. તેઓ 2003-2004માં ભાજપ યુવા મોરચા દિલ્હી અને 2004થી 2006 સુધી ભાજપના રાષ્ટ્રીય સચિવ હતા.રેખા ગુપ્તાએ મનીષ ગુપ્તા સાથે લગ્ન કર્યા છે. મનીષ એક બિઝનેસમેન છે.